Que é
ETIQUETA NEGRA?

Coa intención de poñer en valor e consolidar a imaxe do sector da alimentación gourmet, o Concello de Pontevedra organiza unha feira profesional que abre tamén as súas portas a un público cada vez máis especializado e esixente, que se informa para coñecer o que está a consumir, que lle gusta probar sabores e experimentar texturas novas. Nace así Etiqueta Negra, que baixo o lema “gourmet galego, inspiración innovadora”, pretende amosar tanto a ampla variedade de alimentos e bebidas de alta gama que se están a facer en Galicia, como os procesos de innovación de novos produtos, sabores e envases.

 

Etiqueta Negra aspira a converterse nun dos eventos gastronómicos máis destacados do país, que reunirá nun mesmo espazo a profesionais do sector, produtores e consumidores co fin de coñecer as tendencias de mercado, identificar novas liñas de negocio e difundir a excelencia dos produtos gourmet e delicatessen galegos. Será o mellor escaparate para presentar o gran potencial deste mercado, onde a combinación de innovación e comercialización especializada progresa día a día.

Coa participación de prestixiosos expertos nun programa de actividades atractivas para os visitantes (catas, degustacións, conferencias, presentacións de produtos…), Etiqueta Negra convídanos a descubrir o máis selecto do mercado galego de produtos de calidade diferenciada e marca premium.

Obxectivos

Reforzar a imaxe e o posicionamento de Galicia como rexión produtora de alimentos de calidade e excelencia e de Pontevedra como foco da innovación gastronómica.

Amosar a gran capacidade e o enorme potencial da industria agroalimentaria de Galicia como motor da nosa economía e impulsar o seu desenvolvemento socioeconómico como un sector profesional e innovador.

Promover e contribuír á competitividade e á internacionalización do sector mediante a identificación das súas principais necesidades e dos retos aos que se enfronta.

Fomentar a colaboración, crear relacións e compartir o know-how entre empresas.

Reunir, nun mesmo espazo e lugar, os mellores produtos para a elaboración gastronómica: aqueles máis innovadores, diferentes, únicos ou de alta gama “made in Galicia”.

Facilitar o contacto comercial das empresas participantes cos profesionais do sector que acudan a esta feira.

Favorecer a difusión e apoiar o desenvolvemento de iniciativas e start-ups que se están a levar a cabo na nosa comunidade.

Fomentar as sinerxías entre produtores, representantes, distribuidores, comerciantes e provedores de servizos de alimentos.

Implicar ao tecido hostaleiro e comercial da cidade.

Achegar aos cociñeiros e profesionais da hostalaría produtos e provedores de marcas gourmet galegas.

Amosar aos estudantes de hostalaría a excelencia dos produtos galegos de calidade diferenciada e marca premium.

Sede

Etiqueta Negra celebrarase no pavillón do Recinto Feiral de Pontevedra, un moderno edificio deseñado polo arquitecto Manuel de las Casas cunha lonxitude de 165 metros e unha superficie útil de 4.875 m². O Recinto está conectado desde o interior ao Pazo da Cultura que conta, entre outros espazos, con oito salas para seminarios, un salón de actos de 296 prazas e un auditorio con capacidade para 752 persoas.

Este complexo cultural sitúase na parte noroeste da cidade, na rúa de Alexandre Bóveda, a escasos cinco minutos do centro urbano e perfectamente comunicado coas principais vías de entrada. Atópase rodeado de dez mil metros cadrados de xardíns e zonas verdes, cunhas espectaculares vistas sobre o río Lérez. Trátase dun espazo moi versátil que permite o emprego de forma conxunta de todas as súas dependencias e servizos.

Pontevedra

Pontevedra goza dunha situación estratéxica como capital das Rías Baixas, en pleno Eixo Atlántico, porta de entrada con Portugal e punto clave do Camiño Portugués a Santiago.

A cidade posúe un centro histórico-artístico realmente excepcional, cheo de encanto que convida a perderse polas súas vivas e sempre suxestivas prazas de pedra… Repleta de edificios brasonados, en Pontevedra danse cita os máis diversos estilos arquitectónicos: románico, gótico, plateresco, barroco… Pero tamén o culto e o popular, o laico e o relixioso, a vitalidade e a calma. Todo iso configura un espazo singular que chama a atención polo amigable das súas rúas cheas, non só de monumentos, senón de xente que vive nunha cidade amable, ben conservada e modelicamente peonil e sustentable.

E é que en Pontevedra, cidade hospitalaria e cordial, todo está a un paso. Desde o Museo de Pontevedra, cunha colección de xoias únicas en Europa, con máis de 4.000 anos de antigüidade, ou a Illa do Covo, á que tamén chaman das esculturas polas pezas alí existentes, pasando por monumentos de diferentes estilos artísticos, como a Basílica de Santa María, as góticas Ruínas de San Domingos, a Capela da Peregrina, símbolo e centro neurálxico da cidade, San Francisco, e o barroco San Bartolomé, ata os numerosos pazos e edificacións singulares que adornan prazas como a Praza da Leña, Teucro ou Ferraría.

Pontevedra tamén é un gran escenario urbano para o lecer, a boa gastronomía e a festa. Demóstrano os centos de locais, espallados por todas as prazas e xardíns da cidade, con acolledoras terrazas onde poder degustar todo tipo de propostas culinarias, desde as máis tradicionais ata as máis innovadoras.

Pontevedra, unha cidade de futuro, reconciliada co planeta, amable coas persoas e profundamente urbana.

Se queres máis información:

info@etiquetanegragourmet.com
986 101 323 | 669 459 453
PROMOVE
Patrocinador principal
Patrocinan
Colaboran

Tawi | Gadis | CIFP Carlos Oroza | Gráficas Anduriña | Martínez Blanco Vestiario Profesional | Froiz