Moncho Cuiña, xerente e muiñeiro e Dani Pampín, encargado de calidade, seran os responsables de presentar as fariñas do Muíño de Cuiña. É a primeira das actividades do programa para xornada de inicio de Etiqueta Negra. As persoas que asistan terán a oportunidade de degustar diversos pans elaborados coas fariñas producidas neste muíño, unha singular maridaxe entre tradición e sabores exquisitos e gourmet.

Fariñas moídas á pedra

No Muíño de Cuiña prodúcense fariñas de trigo, trigo integral, centeo, centeo integral, millo branco e millo amarelo. Tamén traballan con fariñas para consumo animal en gran (millo, cebada, trigo, centeo, avena branca e avena negra) e en fariñas (fariña de cebada, fariña de centeo, fariña de millo e mestura de fariña de catro cereais). A marca distribúen os seus produtos en Galicia, Asturias e León. A marca xa pensa en futuro e para os próximos meses prepara diversos proxectos: Unha tenda online, un obrador para clientes na nave de testeo de fariñas, un obrador para aficionados ao pan que se inaugurará a principios de 2017 para aumentar a cultura do pan e traballar cos clientes da tenda online, a recuperación de antigas variedades de cereais plantados en Galicia (Sarraceno, kamut e espelta) e o inicio da produción de cutivos de grans ecolóxicos.

Historia do Muíño de Cuíña

O Muíño de Cuiña construíuse en 1918 cando Eladio Cuiña Taboada, membro fundador, viu a necesidade de moer o trigo que se cultivaba na zona. O lugar escollido para a construción foi o Río Santa Lucía, nunha paraxe única pola súa beleza. Por aquel tempo era un muíño dunha soa pedra e o cobro se facía quedando cunha parte do trigo que a xente levaba para moer (A Maquía). O negocio familiar foi traspasado á seguinte xeración e en vista da súa produción o seu fillo, Luis Cuiña Fondevila, decidiu facer unha reforma pasando a ter 3 pedras de moer, todas elas empuxadas pola forza da auga, que é a maneira de moer tradicional. En 2001 Xosé Cuíña co apoio dos seus irmáns, Ramón e Eladio, decidiron levar a cabo unha reforma íntegra do muíño pasando a ter 7 pedras. Melloráronse todos os sistemas de peneirado e aspiración e tamén os sistemas automatizados de cargas de gran e ensacado da fariña. Foi un cambio enorme en canto a capacidade de moenda e calidade do servizo. Todo sen deixar de lado a moenda en pedra co xerme do gran e característico salvado fino, de aí a súa diferenciación, calidade, textura e inconfundible sabor. Hoxe en día é moi apreciada por prestixiosos cociñeiros, panadeiros e reposteiros que ven nesta fariña a base da súas receitas.  Actualmente é a cuarta xeración a que xestiona o muíño, que pasou de mantelo por puro romanticismo a ter unha elevada demanda do mercado deste produto, integramente natural e 100% libre de aditivos.